Nýtt skoskt-íslenskt flugfélag

Hið nýja skosk-íslenska flugfélag, Citystar Airlines, fór í sitt fyrsta flug frá Íslandi í fyrradag. Ferðinni var heitið til Glasgow í Skotlandi með fulla vél af mótorhjólaáhugamönnum á vegum SBK í Keflavík, samkvæmt vef Víkurfrétta. Citystar Airlines flýgur Dornier 328 turbo prop vél sem er vel búin 32 leðursætum og þykir öll hin glæsilegasta. Mun flugfélagið hefja áætlun sína í Aberdeen í Skotlandi þann 28. mars nk. og verður þá flogið til Ósló. Þess á milli mun það vera í leiguflugum, m.a. milli Íslands og Skotlands. Citystar Airlines munu fljúga undir íslensku flugrekstarleyfi í samstarfi við Landsflug á Íslandi. Myndirnar voru teknar af vélinni þegar hún var nýlent á Keflavíkurflugvelli á fimmtudagskvöldið.