Vilja karlaathvarf

Sjö prósent feðra sem hafa samband við Félag ábyrgra feðra kvarta yfir líkamlegu ofbeldi af hendi sambýliskvenna sinna að sögn Garðars Baldvinssonar, formaður félagsins. Hann telur því mikla þörf á að koma upp karlaathvarfi. Þetta ræddi hann við Steinunni Valdísi Óskarsdóttur borgarstjóra á miðvikudag, auk þess sem henni var kynnt stefnuskrá félagsins og afhent bókin Feður og börn á nýrri öld sem félagið gaf út nýverið. Karlaathvarfið er hugsað sem upplýsingasetur með ráðgjöf og húsnæðisaðstoð fyrir forsjárlausa feður sem lenda í erfiðleikum. Ekki er ljóst hvað slíkt athvarf myndi kosta en Garðar telur að 10 til 20 milljónir á ári séu nærri lagi. Sú fjárhæð segir hann að sé eins og dropi í hafið miðað við fjárhagslegt tap karla eftir skilnað en þeir lendi oft í því að gefa eftir húsnæði og taki á sig skuldir. Eigi þeir oft í fjárhagsvandræðum í mörg ár á eftir. Borgarstjóri tók að sögn vel í hugmyndir félagsins en gaf þó engin loforð. Þess má geta að karlaathvörf eru rekin í Bandaríkjunum, Bretlandi og á Norðurlöndum "Forsjárlausir feður eru stór hópur og lítið gert fyrir þá," segir Garðar sem telur oft á tíðum mannréttindi brotin á forsjárlausum feðrum og ætlunin sé að koma einhverjum málum til mannréttindadómstólsins í Strassborg. Þá telur Garðar að kerfið sem búið sé við í dag komi í veg fyrir að börn læri að þekkja og virða báða foreldra og að viðurkenningu skorti á því að börn búi á tveimur stöðum þó að forsjá þeirra sé hjá öðru foreldrinu. Fjöldi skilnaðarbarna er liðlega 21 þúsund á Íslandi og meðlagsgreiðendur eru um 12 þúsund. Félaginu berast um 500 hringingar á ári og eru 87% þeirra frá feðrum í vandræðum.