Gæti skaðað ímynd Íslands

"Frá markaðslegu sjónarmiði mun þróun og ræktun á erfðabreyttum lífverum eða matvælum hafa áhrif á þá ímynd sem við viljum byggja upp af landinu okkar," segir Baldvin Jónsson, verkefnisstjóri hjá Bændasamtökunum. Baldvin er einn þeirra sem telja að stíga verði varlega til jarðar þegar kemur að rannsóknum, þróun og ræktun á erfðabreyttum lífverum og matvælum ellegar geti ímynd Íslands erlendis hlotið hnekki. Baldvin stýrir átaksverkefni um framleiðslu og markaðssetningu vistvænna og lífrænna afurða og segist fá fyrirspurnir erlendis frá hvar Ísland standi hvað viðkemur erfðabreytingum. "Mín skoðun er sú að flýta verður sér hægt enda eru erfðabreytingar mjög í umræðunni erlendis og yfirleitt með neikvæðum formerkjum. Ég er ekki á móti rannsóknum af því tagi sem hér eiga að fara fram enda hluti af framtíðinni en ég spyr hvort þetta sé bráðnauðsynlegt verkefni á þessari stundu." Júlíus B. Kristinsson, framkvæmdastjóri ORF-Líftækni, en fyrirtækið sérhæfir sig í þróun á erfðabættum plöntum til framleiðslu á sérvirkum próteinum, segist kunnugur þeim gagnrýnisröddum sem heyrst hafa. Hann fullyrðir að eftirlit með ræktuninni sé afar strangt og engar rannsóknir bendi til að hætta sé á víxlverkun erfðabreyttu byggplöntunar hérlendis. "Skilyrði hér á landi fyrir ræktun byggs eru afar góð og hætta á víxlverkun í náttúrunni lítil sem engin enda plantan mjög afmörkuð. Hún þarf ummönnun til að lifa og við höfum enga plöntu fundið sem lifir lengur en eitt ár án sáningar og áburðar." Hann fagnar allri faglegri umræðu um málið en segir staðreyndirnar tala sínu máli. "Það má segja að um storm í vatnsglasi sé að ræða enda værum við ekki að vinna að þessu verkefni ef einhver hætta væri fyrir hendi. Áhugasamir þurfa aðeins að skoða staðreyndir málsins til að sjá að erfðabreytingar er nytsöm og þörf tækni og gefur gríðarlega möguleika." Byggfræ eru afbragðs uppspretta próteins og hægt að geyma líftækniprótein í fræjunum í langan tíma. Þetta þykir lykilatriði við framleiðsluna og ástæða þess að ORF-Líftækni vill þegar fram líða stundir nýta 6000 hektara lands undir framleiðslu sína.