Nýr háskóli boðar bændum nýja tíma

Staða landbúnaðarins er styrk, að því er fram kom í setningarræðu Haraldar Benediktssonar, formanns Bændasamtaka Íslands, við setningu Búnaðarþings á Hótel Sögu í Reykjavík í gær. Hann sagði milda tíð og mikla afurðasölu endurspegla styrk landbúnaðarins. Á Búnaðarþingi eiga sæti fulltrúar bænda af landinu öllu sem að sögn Haraldar eiga að vinna að mótun á framtíðarmöguleikum í greininni. Guðni Ágústsson landbúnaðarráðherra sagði í ávarpi sínu á þinginu stórtíðindi síðasta árs vera stofnun Landbúnaðarháskóla Íslands og sagði skólann vera "nýtt flaggskip landbúnaðarins sem boðar bændum nýja tíma." Hann sagði að ef skoðuð væri þróun síðustu ára blasti við hvað menntun og rannsóknir hefðu skilað miklu. "Þrátt fyrir sársaukafullar breytingar á borð við fækkun og stækkun búa sýnir sig að vísindi og tækni efla alla dáð og gera störf bóndans markvissari," sagði hann. Guðni sagði heilbrigði bjúfjár tryggja gæði framleiðslu bænda og upplýsti að til stæði að setja á stofn nefnd sem fara á yfir aðferðafræðina sem beitt er gegn búfjársjúkdómum og gerði tilllögur til framtíðar.