Sjómennska fram yfir stærðfræði

Strákar í Sandgerði vilja frekar fara á sjóinn en læra stærðfræði. Þetta kemur fram í grein í bandaríska stórblaðinu Time. Munur á getu kynjanna er þar meiri en víða annars staðar. Stærðfræðiþekking skólakrakka í Sandgerði er umfjöllunarefni greinar Time en í henni er vitnað í alþjóðlega könnun sem gerð var meðal grunnskólabarna. Þar kemur meðal annars fram að munur á getu stráka og stelpna í stærðfræði í Sandgerði er meiri en annars staðar. Munurinn er að meðaltali um 15 stig en í Sandgerði er munurinn á milli kynja 30 stig. Í greininni í Time eru viðtöl við stráka og stelpur þar sem fram kemur að strákarnir vilji helst komast sem fyrst á sjóinn og að þeir græði ekkert á því að læra stærðfræði. Stelpurnar líta hins vegar á grunnskólanám sem ávísun á frekara nám. Í greininni er haft eftir Guðjóni Kristjánssyni, skólastjóra grunnskólans í Sandgerði, að ungir strákar sjái að eldri bræður þeirra eigi betri bíl og stærra hús en skólastjórinn þrátt fyrir að hafa aðeins verið á sjó í tvö ár. Sjómennskan gefi því augljóslega betur af sér en kunnátta í stærðfræði.