Áburðarverksmiðjunni lokað í sumar

Áburðarverksmiðjan í Gufunesi hefur runnið skeið sitt á enda. Henni verður lokað í sumar og sekkjun og pökkun látin fara fram í útlöndum. Í vor flyst starfsemi verksmiðjunnar til Eistlands þar sem sekkjun og blöndun áburðarins fer fram undir eftirliti Áburðarverksmiðjunnar. Söluskrifstofan verður á höfuðborgarsvæðinu en áburður afgreiddur frá Grundartanga og Þorlákshöfn. Fimm starfsmönnum Áburðarverksmiðjunnar sem störfuðu við blöndun og sekkjun hefur verið sagt upp störfum og fyrirtækið selt hlutafélaginu Sveitum sem er að stærstum hluta í eigu Kaupfélags Borgfirðinga, Kaupfélags Skagfirðinga og Kaupfélags Héraðsbúa. Kaupverð er ekki gefið upp en Haraldur Haraldsson, oft kenndur við Andra, keypti Áburðarverksmiðjuna ásamt fleiri fjárfestum árið 1999 á 1300 milljónir króna. Starfsemi Áburðarverksmiðjunnar hefur verið í Gufunesi frá árinu 1954 og hvílt á hornsteini sem Ásgeir Ásgeirsson, fyrrverandi forseti Íslands, lagði að verksmiðjunni. Fyrir um aldarfjórðungi störfuðu ekki færri en 250 manns í verksmiðjunni en nú verða þeir aðeins fimm. Sigurður Þór Sigurðsson, framkvæmdastjóri Áburðarverksmiðjunnar, segir að nú sjái fyrir endann á löngu þróunarferli. Fyrirtækið hafi smám saman verið að breytast í sölufyrirtæki og þetta sé lokaskrefið í því. Þegar sprenging varð í verksmiðjunni haustið 2001 hófust viðræður milli eigenda hennar og borgaryfirvalda um að leggja verksmiðjuna niður á þessum stað. Reykjavíkurborg eignaðist lóðina og verksmiðjuhúsin í framhaldi af því með það í huga að byggja þar upp íbúða- og iðnaðarhverfi.