Býður Gæslunni eldsneyti

Markaðsstjóri Atlantsolíu hvetur Landhelgisgæsluna til að kaupa eldsneyti af Atlantsolíu þegar kaupin fara fram hér á landi. Hann telur Skeljung hafa fyrirgert þeim rétti sínum að vera birgir Gæslunnar. Forstjóri Landhelgisgæslunnar sagði í fréttum Stöðvar 2 í gær að íslensku olíufélögin hefðu farið svo illa með Gæsluna á síðustu árum að ekki væri keypt af þeim olía nema brýna nauðsyn bæri til. Þegar Landhelgisgæslan kaupir eldnseyti hér á landi er það hjá Skeljungi samkvæmt útboði Ríkiskaupa sem fram fór á síðasta ári. Um er að ræða viðskipti upp á tugi milljóna og mælist Hugi Hreiðarsson, markaðsstjóri Atlantsolíu, til þess að forstjórinn beini viðskiptum sínum til félagsins. Hann segist sérstaklega horfa til þeirra viðskipta sem fram fari á suðvesturhorni landsins, þeirra viðskipta sem Atlantsolía geti boðið í. Í viðtalinu hafi forstjórinn ekki sagst vilja skipta við íslensku olíufélögin en hafi líklega gleymt Atlantsolíu. Hann hvetji Langhelgisgæsluna og aðra stórnotendur að leita tilboða. Hugi segir að það útboð sem fram hafi farið á síðasta ári geti jafnvel talist marklaust vegna reglna um hæfi bjóðenda. Hann vísar þar í 28. grein laga um opinber innkaup sem segir að að heimilt sé að vísa bjóðanda frá á hvaða stigi útboðs sem er ef hann hafi með dómi verið fundinn sekur um refsivert brot í starfi. Hann segir að athugandi sé hvort heimfæra megi þessa lagagrein á niðurstöðu samkeppnisyfirvalda um verðsamráð stóru olíufélaganna. Georg Lárusson, forstjóri Landhelgisgæslunnar, sagði í samtali við fréttastofu Stöðvar 2 í dag að málið yrði skoðað vandlega og þá með hliðsjón af því hvar Landhelgisgæslan gæti fengið ódýrustu olíuna án þess að brjóta samninga.