Sjávarútvegsakademía opnuð í dag

Norræna sjávarútvegsakademían var formlega opnuð í dag. Stofnunin á að verða samnefnari fyrir norrænar rannsóknir á auðlindum sjávar en hún hefur ekki ákveðið aðsetur heldur er um að ræða samvinnuverkefni sem stjórnað verður frá Háskólanum í Björgvin. Svein Ludvigsen, sjávarútvegs- og samstarfsráðherra Noregs, Valgerður Sverrisdóttir viðskipta- og samstarfsráðherra og Jógvan við Keldu, samstarfsráðherra Færeyja, opnuðu akademínuna við hátíðlega athöfn í Umhverfisskóla Eyrarsunds í Kaupmannahöfn fyrr í dag. Auk þess flutti Guðrún Pétursdóttir, forstöðumaður Sjávarútvegsstofnunar Háskóla Íslands, ræðu við athöfnina. Hugmyndin með akademíunni er að þróa þekkingu á Norðurlöndum á sviði sjávar- og fiskveiðitengdra rannsókna á öllu því sem tengist auðlindum sjávar, lífríki sjávar í heild sinni, sjálfbærri nýtingu, veiðum og vinnslu sjávarafurða auk vatnsgæða. Að Norrænu sjávarútvegsakademíunni standa Norræni vinnuhópurinn um fiskveiðirannsóknir (NAF) og Norræna rannsóknaráðið (NordForsk) sem hvort um sig styrkir akademíuna með 5 milljónum danskra króna, um 55 milljónum íslenskra króna, á fimm árum.