Milljónahækkanir í hverjum mánuði

Það hefur ekki farið fram hjá nokkrum að fasteignaverð á suðvesturhorni landsins hefur margfaldast undanfarin ár og sér ekki enn fyrir endann á. Það þykir mörgum undarlegt hversu mjög verð halda áfram að hækka og eru ýmsir á þeirri skoðun að fasteignasalar sjálfir geri sitt ítrasta til að halda verðum í hámarki enda hærri söluþóknun í boði fyrir vikið. Þeim dæmum fer fjölgandi sem berast inn á borð Fréttablaðsins þar sem ýmsir setja spurningarmerki eða gera athugasemdir við verðmyndun á fasteignamarkaðnum. Eðlilegt er að verð hækki þegar eftirspurn er meiri en framboð eins og verið hefur en engu að síður eru til dæmi um verðhækkanir á sömu eignum um milljónir króna á örfáum mánuðum. Á Vatnsendasvæðinu er verið að selja ýmsar eignir þar á meðal tvílyft parhús sem eðli málsins samkvæmt eru eins að allri gerð og lögun. Ein hæðin á slíku húsi var seld fyrir þremur mánuðum síðan ásamt bílskúr fyrir 24 milljónir króna og nýverið var næsta hæð við hliðina auglýst til sölu ásamt sams konar bílskúr fyrir rúmar 28 milljónir króna. Það er hækkun um tæplega 1.4 milljónir á mánuði. Kjallaraíbúð í vesturbæ Reykjavíkur var til sölu fyrir tæpar átta milljónir fyrir ári síðan. Stutt er síðan sama íbúð var aftur auglýst til sölu en eigendinn fór fram á 12. 8 milljónir. Ekkert hafði verið unnið að endurbótum á umræddri íbúð í millitíðinni. Grétar Jónasson, formaður félags fasteignasala, segist kannast við þá umræðu að fasteignasalar geri sitt besta til að halda íbúðarverðum í hámarki en segist fullviss að meirihluti þeirra stundi slíkt ekki. "Auðvitað er auðvelt að halda slíku fram en staðreyndin er sú að þrátt fyrir að þóknun viðkomandi stofu eða sölumanns hækki í hlutfalli við söluverð þá er það ekki há upphæð og mér er til efs að til séu menn sem elta slíkt. Svo má ekki gleyma því að ábyrgð fasteignasala er mikil og ef kaupanda þykir eftir á að hyggja kaupverð óeðlilega hátt þá eru lög og reglur hans megin og hann getur stefnt fasteignasalanum. Þessi viðurlög eru hörð gagnvart öllum sem fasteignasölu stunda og velflestir ef ekki allir sem fasteignasölu stunda vita vel af þeim lögum og reglum sem gilda um stéttina."