Heilbrigðisþjónusta við börn bætt

Heilbrigðisráðherra segir áríðandi að bæta heilbrigðisþjónustu við börn sem stríða við þunglyndi og aðrar geðraskanir. Vandamálið stafar að hluta til af örum samfélagsbreytingum, að mati heilsugæslulæknis, sem segir að of fá börn séu meðhöndluð. Við sögðum frá því í fréttum Stöðvar 2 í gær að einn af hverjum fimm unglingum í 9. og 10. bekk hefur alvarleg þunglyndiseinkenni þannig að gera má ráð fyrir því að fjórir til fimm í hverjum bekk í þessum aldurshópi glími við þetta vandamál að jafnaði. Þetta sýnir ný íslensk rannsókn Guðrúnar Kristjánsdóttur, prófessors í hjúkrunarfræði og fleiri. Atli Árnason, heilsugæslulæknir í Grafarvogi, segir að of fá börn sem glími við geðraskanir séu meðhöndluð. Það sjáist best á því hversu ört þeim fjölgar. Hann segir vandamálið að hluta til stafa af örum samfélagsbreytingum Hvað varðar þunglyndiseinkenni þá sýnir fjöldi rannsókna að þunglyndi helst í hendur við breytingar og upplausn, bæði í fjölskyldulífi og samfélagi. Rannsókn Guðrúnar Kristjánsdóttur leiddi til dæmis í ljós að börn sem búa við flókið fjölskyldumynstur sýna meiri þunglyndiseinkenni, svo sem skilnaðarbörn og börn einstæðra mæðra. Þá kom í ljós að börn sem búa í dreifbýli hafa meiri þunglyndiseinkenni en önnur börn og skýrir Guðrún það með því að þau sjái ekki eins marga framtíðarmöguleika og börn sem búa í þéttbýli - atvinnuleysi sé meira í dreifbýlinu, einhæfari atvinnumöguleikar og oft meiri einangrun. Einnig eru tengsl milli minna menntaðra foreldra og þunglyndiseinkenna barna þeirra. Á heilsugæslustöðinni í Grafarvogi var ýtt úr vör í gær sérstökum meðferðarhópi sálfræðinga, félagsráðgjafa og hjúkrunarfræðinga til að vinna fyrirbyggjandi starf á þessu sviði og nálgast börnin, m.a. í skólum, áður en mál þeirra þróast á verri veg. Heilbrigðisráðherra segist vilja setja upp sömu starfsemi sem víðast. Það hafi lengi verið ætlunin að efla heilsugæslu við börn á þessu sviði því áríðandi sé að greina geðraskanir snemma.