Slys í Bandaríkjunum vekur ótta

Níu létust í Suður-Karólínu í Bandaríkjunum þegar fragtlest sem flutti klór rakst á aðra kyrrstæða á fimmtudag og klórgas komst í andrúmsloftið. Um 250 manns þurftu læknisaðstoð og 5,400 íbúum var gert að rýma hús sín í flýti í tæplega tveggja kílómetra radíus. Þeir fá ekki að snúa heim fyrr en í fyrsta lagi á þriðjudag. Enn er reynt að stöðva lekann, samkvæmt fréttum Associated Press, AP. Íbúar í Kópavogi hafa hringt og lýst áhyggjum sínum við Fréttablaðið af veru klórgasverksmiðju Mjallar-Friggjar í Vesturvör í Kópavogi. Ekkert er vitað um framleiðslu fyrirtækisins en vitað er að þegar fyrirtækið flutti frá Fosshálsi í Reykjavík fylgdu þrýstihylki með klórgasi og hófst vinnsla án tilskilinna leyfa. Sótt var um leyfi til klórframleiðslu. Því var hafnað af Heilbrigðiseftirliti Hafnarfjarðar og Kópavogs. Bæjarráð hefur málið til skoðunar og ætlar að álykta um það 13. janúar. Guðmundur H. Einarsson, framkvæmdastjóri Heilbrigðiseftirlits Hafnarfjarðar og Kópavogs, segir fyrirtækið fá að klára þær birgðir sem það flutti með sér. Heilbrigðiseftirlitið viti hvorki hve miklar þær séu né hvort þær séu geymdar á öruggan hátt. Það sé í verkahring slökkviliðsins en litlar líkur séu á slysi. Bjarni Kjartansson, yfirmaður eldvarnareftirlits slökkviliðsins, segir bráðabirgðaúrbætur hafa verið gerðar á eldvörnum hússins. Þær séu vel ásættanlegar. Í mesta lagi séu sex tonn af klóri í vinnslu og sex tonn í gámi á svæðinu: "Við höfum skyldu samkvæmt lögum að bregðast við ef slys verður með hættuleg efni. Við höfum hins vegar ekkert að segja um umbúnað og varnir gegn því, það er í umsjón vinnueftirlits og heilbrigðiseftirlits, nema hvað varðar brunaþáttinn. Það segir sig sjálft að eldsvoði í húsi sem hefur að geyma umtalsvert magn af hættulegum efnum getur orðið að umhverfisslysi." Ekki fékkst samband við Hinrik Morthens, eiganda eignarhaldsfélags Filtertækni og Mjallar-Friggjar. Sagt var að hann kysi að svara ekki fjölmiðlum.