Muwango er ekta amatör

Félagi íslenskra radíóamatöra hefur ákveðið að gefa tveimur munaðarlausum drengjum frá Úganda, þeim Muwango og Peter, nýtt útvarp. Tilefnið er grein sem birtist 16. október í Fréttablaðinu um hátt hlutfall almænissmitaðra í Úganda. Fyrir vikið er fjöldinn allur af börnum munaðarlaus, þar á meðal þeir Muwango og Peter. Í greininni kom fram að Muwango hafði útbúið loftnet úr reiðhjólagjörð og gaddavír og gat þannig hlustað á fimm útvarpsstöðvar en hann hefur mikinn áhuga á fréttum og umheiminum. Hingað til hefur hann notast við gamalt og lúið útvarpstæki sem er tengt frumstæðum hátalara úr vatnsbrúsa sem hann hefur sjálfur búið til. Útvarpið gengur fyrir rafhlöðum sem eru mjög dýrar og því nauðsynlegt að fara sparlega með þær. Haraldur S. Ólafsson, formaður Félags íslenskra radíóamatöra, segir að Muwango sé ekta amatör. "Þetta er akkúrat það sem þetta snýst um, að prófa sig áfram og finna út að eitt er betra en annað. Við hrifumst að þessari grein og ákváðum að gefa honum nýtt útvarp og rafhlöður," segir Haraldur. Félagið hefur þegar afhent Jónasi Þóri Þórissyni, framkvæmdastjóra Hjálparstarfs kirkjunnar, pening sem hann mun síðan nota til að kaupa stuttbylgjuútvarp í Úganda, því þau eru mikið notuð í Afríku. Félag íslenskra radíóamatöra, Í.R.A., var stofnað árið 1946 og verður því 60 ára á næsta ári. Meðlimir eru um 120 talsins og til að fá inngöngu þarf að taka próf hjá Póst- og fjarskiptastofnun sem eru haldin tvisvar á ári. Félagið er til húsa í gamla Skeljungshúsinu í Skerjafirði. "Sumir eru í loftinu, þ.e. í samböndum um allan heim. Aðrir spjalla um tæknimál og bara um daginn og veginn líka," segir Haraldur um starfsemina og vill minna á heimasíðuna ira.is. Tengist hún ekkert hryðjuverkasamtökunum alræmdu eins og einhverjir kynnu að halda.