Varla fært fyrir Horn

Varað er við siglingaleiðinni um Horn. Þéttur ís liggur upp að ströndinni og er það álit skipstjóra, Landhelgisgæslu og Veðurstofu Íslands að leiðin sé ófær. Þór Jakobsson veðurfræðingur sagði þéttleika íssins við Horn vera um fimm áttundu hlutar, sem þýðir að meira en helmingur sjávarflatarins er þakinn ís. Hann sagði að ísinn væri þó gisnari eftir því sem austar drægi. Þá væri ís suður með ströndinni í vestanverðum Húnaflóa. Einnig hafi frést af ís í Skagafirði en ekki væri ís á norðanverðum Austfjörðum. Þór segir áfram ríkja norðaustanátt sem sé jákvætt þar sem ekki eru líkur á að meiri ís bætist við þann sem fyrir er. Grímseyingar voru lausir við ísinn á mánudag. Í gær var aftur kominn svo mikill ís að ákveðið var að strengja fyrir höfnina, og var lítið veitt þann daginn. Auðunn F. Kristinsson, yfirstýrimaður á flugvél Landhelgisgæslunnar FR-SYN, flaug yfir svæðið á mánudag. Þá var farið að grisjast úr ísnum fyrir Norðurlandi, en sums staðar fóru ísdreyfar og ísspangir inn í flóa og firði. Þetta voru þéttar spangir en vítt á milli þeirra þannig að vel var hægt að sigla þar með aðgát að sögn Auðuns. Ísinn var þegar farinn að þéttast við Hornströnd og Bjargir þegar Auðunn flaug þar á mánudag en þá var enn hægt að þvælast þar á skipi. Síðan þá hefur ísinn þést enn meir og siglingar varla mögulegar. Engin skip voru að veiðum frá Reitnum við Straumnes og austur fyrir Húnaflóa í gær eftir upplýsingum frá Tilkynningaskyldunni. Gunnar Steingrímsson hjá Sauðárkrókshöfn sagði allt vera í sómanum hjá sér, enda væri engan ís að sjá á Skagafirði. Hins vegar hefði hafrannsóknarskipið Bjarni Sæmundsson, sem var á togararalli, flúið inn í höfnina og lægi þar við bryggju. Þá seinkaði flutningaskipi sem koma átti með áburð um tvo daga vegna veðurs og íss.