Herbalife-salar á alheimsráðstefnu

Íslenskir Herbalife-salar eru margir orðnir spenntir fyrir ráðstefnunni miklu í Atlanta í Bandaríkjunum í næsta mánuði og á heimasíðu þeirra eru dagarnir taldir niður. Heimsráðstefnur eru haldnar árlega en stemningin er óvenju mikil nú því 25 ár eru liðin frá stofnun Herbalife og afmælið haldið hátíðlegt um leið. Verður því meira um dýrðir en vanalega. Og ekki spillir hagstætt gengi dals. Óljóst er hve margir Íslendingar ætla utan; sumir segja nokkrir tugir, aðrir nefna töluna hundrað og enn aðrir segja hópinn fylla heila þotu. Hvað sem því líður er ljóst að hugur er í fólki. "Jú, jú, maður lætur þetta ekki framhjá sér fara, þetta gerist bara einu sinni á lífsleiðinni," segir Ásta María Eggertsdóttir, Herbalife-sali í Hólahverfinu í Reykjavík. Hún mun sitja ráðstefnuna, sem stendur 14.-17. apríl, en ætlar út nokkrum dögum fyrr til að slappa af og njóta lífsins. Ásta María hefur setið alheimsráðstefnur Herbalife undanfarin ár, til dæmis í Barcelona, Köln og París, og segir það engu líkt. "Það skapast ólýsanleg samstaða og þetta er mjög góð tilfinning. Það er sérstaklega gaman að vera á þessum stóru ráðstefnum og á gangi niðri í bæ og hitta fólk úr hópnum. Það er bara eins og að hitta ættingja. Slík er samstaðan og væntumþykjan," segir Ásta María. Að auki er hún stolt af að taka þátt í að bæta heilsu fólks. "Fólk þarf að taka sig á ef það ætlar ekki að drukkna í eigin spiki. Það færir mér mikla gleði að geta hjálpað til." Sjálf byrjaði Ásta María að nota Herbalife fyrir sjö árum og hefur aldrei liðið betur. Segir lífsgæði sín hafa aukist til muna frá því sem áður var. Áður vann hún hjá hinu opinbera en hefur nú viðurværi sitt af Herbalife-sölunni. Ásta María er ánægð með sig og sitt og þarfnast einskis. Hún ætlar því ekki að þræða búðirnar í Bandaríkjunum þó að verðið sé hagstætt nú um stundir. "Ég er svo heppin að ég á allt af öllu og þarf ekki meira. Ég ætla bara að njóta lífsins og skemmta mér," segir hún en útilokar samt ekki að hún líti inn í eina eða tvær verslanir með vinkonum sínum. Eins og á öðrum pylsum er endi á þeirri pylsu sem heimsráðstefna Herbalife-fólks í Atlanta er. Og vitaskuld leynist þar rúsína. Sjálfur Elton John mun spila fyrir ráðstefnugesti á föstudagskvöldinu. Og þeir þurfa ekki að borga krónu fyrir. "Já, Herbalife býður okkur upp á tónleika með Elton," segir Ásta María og hlakkar mjög til að hlýða á það ágæta söngvaskáld. "Einu sinni var okkur boðið upp á Annie Lennox og það var stórkostleg upplifun."