Bjartsýnn þrátt fyrir slys

Tuttugu og þriggja ára gamall maður, Magnús Árni Hallgrímsson, dvelur nú á Landspítalanum í Fossvogi eftir að hafa misst vinstri fótinn fyrir neðan hné í slysi um borð í togara í síðustu viku. Þrátt fyrir slysið er Magnús Árni bjartsýnn og gerir ráð fyrir að geta lifað eðlilegu lífi með aðstoð gervifótar. Magnús Árni var fluttur með þyrlu Varnarliðsins á slysadeild Borgarspítalans en slysið varð upp úr hádegi á fimmtudaginn í síðustu viku. Magnús Árni var háseti á togaranum Hauki EA og hafði verið þar síðustu tvö ár. Þegar slysið varð var báturinn staddur um 12 sjómílur vestur af Stafnesi á Reykjanesi. Magnús Árni segist ekki muna mikið eftir slysinu. Hann hafi verið að draga niður kaðal sem hafi fest og farið öfugt og hann hafi flækst í honum. Magnús segir að skipsfélagarnir hafi brugðist hratt og skjótt við þegar þeim varð ljóst hvað hafði gerst. Einn félaga hans hafi áttað sig strax á aðstæðum og bundið strax utan um fótinn og hert að til að draga úr blæðingunni. Viðbrögð manna hafi annars verið misjöfn eins og almennt gerist. Magnús segir aðspurður ekki hafa áttað sig strax á því hversu alvarlegt slysið hafi verið. Það hafi hann ekki gert fyrr en hann hafi vaknað á sjúkrahúsinu, en þá hafi kærastan hans sagt honum að hann hefði misst fótinn. Aðspurður hvernig upplifun það sé fyrir ungan mann að missa fótinn segist Magnús lítið hafa velt þessu fyrir sér. Hann eigi eftir að geta unnið eins og áður þar sem hann geti fengið gervifót. Magnús segir aðspurður að sér líði ágætlega í dag miðað við hversu alvarlegt slysið hafi verið. Hann sé bjartsýnn á framtíðina. Magnús Árni dvelur nú á bæklunardeild Borgarspítalans þar sem hann jafnar sig eftir aðgerðina. Á næstu mánuðum mun hann hefja endurhæfingu og fá gervifót frá stoðtækjafyrirtækinu Össuri. Magnús er bjartsýnn á framtíðina og vonast til að komast á sjóinn á nýjan leik.