Sýknaðir af hópnauðgun

Dómstólar í Pakistan hafa sýknað fimm menn af hópnauðgun. Málið vakti heimsathygli á sínum tíma en nauðgunin var refsing konu sem varð bitbein í illdeilum tveggja ættbálka. Sex pakistanskir karlmenn voru fyrir rúmum tveimur árum dæmdir til dauða fyrir hópnauðgun. Fórnarlambið var Mukhtar Mai sem hafði reynt að tala máli tólf ára bróður síns sem sjálfum var nauðgað af mönnum frá valdameiri ættbálki. Til að refsa henni og fjölskyldu hennar skipaði sérstakt ættbálkaráð fjórum mönnum að nauðga henni. Mörg hundruð manns horfðu á og gerðu ekkert til að stöðva ofbeldið. Pakistanskir dómstólar sýknuðu í gær fimm mannanna vegna ónógra sannana og dauðadómi yfir þeim sjötta var breytt í lífstíðarfangelsi. Mukhtar Mai hefur lagt líf sitt í hættu við að segja frá ofbeldinu og ætlar ekki að gefast upp. Hún segist ætla fara með málið til Hæstaréttar þar sem hún sé ekki sátt við niðurstöðuna og hún muni berjast þar til yfir lýkur. Hún segir enn fremur að þar sem hinir seku gangi nú lausir sé líf hennar og fjölskyldunnar í hættu. Áður hafi hættan verið minni þar sem lögreglustöð hafi verið nálægt heimili hennar og nú biðji hún stjórnvöld um að koma upp varanlegri varðstöð við heimilið. Málið hefur dregið athygli manna og mannréttindasamtaka að hlutverki slíkra ættbálkaráða. Vonir stóðu til að þetta mál yrði til þess að yfirvöld í Pakistan reyndu að ná stjórn á málunum en slík ættbálkaráð eru oft mjög valdamikil.