Snúið við eftir útkall nyrðra

Þyrlu Landhelgisgæslunnar var snúið við um klukkan þrjú eftir að hafa verið kölluð til að sækja slasaðan vélsleðamann. Björgunarsveitarmenn úr Björgunarsveitinni Stefáni úr Mývatnssveit töldu ekki nauðsynlegt að fá þyrlu á staðinn eftir að þeir mátu ástand mannsins og ákváðu sjálfir að koma honum undir læknishendur. Talið er að maðurinn sé slasaður á olnboga. Upphaflega tilkynnti lögreglan á Húsvík um vélsleðaslys nálægt Dettifossi um klukkan hálfþrjú en þá hafði einn þeirra sem var með þeim slasaða í för keyrt í símasamband til að tilkynna um slysið. Áhöfn þyrlunnar var á æfingu með Slysavarnarskóla sjómanna þegar hún var kölluð út.