Á sama vinnustað í 56 ár

Akureyringurinn Svavar Friðrik Hjaltalín lauk starfsævi sinni á nýliðinni Þorláksmessu. Þá hafði hann starfað á sama vinnustaðnum í 56 ár en vinnuveitandinn var Útgerðarfélag Akureyringa sem nú er í eigu Brims. Svavar, sem varð sjötugur í vetur, byrjaði að vinna hjá ÚA 14 ára gamall og þegar hann hætti þar á Þorláksmessu gaf Brim honum listaverkið „Traustir hlekkir" eftir Hallgrím Ingólfsson á Akureyri. Verkið samanstendur af þremur hlekkjum úr fótreipiskeðju af Kaldbaki EA og fjörugrjóti af lóð Brims á Akureyri en á gullplötu á listaverkinu er letrað: Svavar Hjaltalín – Með þökk fyrir 56 ára gæfuríkt samstarf. Með fylgdi karfa hlaðin góðgæti. Svavar vann undir stjórn allra þeirra sem stýrt hafa ÚA og síðar Brimi: Guðmundi Guðmundssyni, Andrési Péturssyni, Gísla Konráðssyni, Vilhelm Þorsteinssyni, Gunnari Ragnars, Guðbrandi Sigurðssyni, Gunnari Larsen og Guðmundi Kristjánssyni. Ber hann mikið lof á stjórnendur félagsins í gegnum tíðina og telur að velgengni þess megi þakka dug þeirra og framsýni sem og þeirri gæfu að félagið hafi alltaf haft yfir að ráða góðu starfsfólki.