Fórnarlömb asískra kortasvindlara

Hátt í 200 Íslendingar urðu fórnarlömb þaulskipulagðra asískra kortasvindlara í Bandaríkjunum sl. haust þar sem þeir náðu númerum af kreditkortum og debetkortum þúsunda einstaklinga. Upp um kortasvindlið komst í lok febrúar en það voru asískir glæpamenn sem komu fyrir eftirlitsbúnaði í hraðbönkum í New York í ríkjunum í nóvember í fyrra. Þeir settu nema þar sem kortinu er stungið inn og myndavél fyrir ofan lyklaborðið þannig að hægt væri að komast að pin-númeri korthafans. Svindlararnir biðu í þrjá mánuði með að nota kortin og náðu að svíkja peninga út af 24 kreditkortum íslenskra einstaklinga. Fjárhagslegt tap kortafyrirtækjanna vegna þessara korta nemur um fjórum milljónum króna. Tap kortafyrirtækjanna vegna svindls af þessu tagi er upp undir 70 milljónir króna á ári. Halldór Guðbjarnarson, framkvæmdastjóri Visa Ísland, segir að fyrirtækið hafi orðið fyrir árás frá Taílandi um daginn. Annars gerist þetta stundum daglega að hans sögn. Og hann segir óskaplega erfitt fyrir korthafa að vara sig á þessu. Auk aðferðanna sem að framan greinir er algengt að kortasvindlarar nái kortanúmerum af viðskiptavinum sem versla á óöruggum vefsíðum þar sem þeir gefa upp kortanúmer. Halldór segir að í sumum löndum Evrópu sé meira um kortasvindl en annars staðar. England sé mjög slæmt en einnig sé mikið um slíkt svindl á Ítalíu og Spáni. Halldór segir að verið sé að þróa nýja tegund korta sem geri svindlurum erfiðara fyrir. Þau eru með örgjörva sem sé nokkuð öflug tölva og komi í stað segulrandarinnnar. Með því vonar Halldór að kortafyrirtækin séu alltaf skrefi á undan þjófunum.