Leikarar verði verkefnaráðnir

Óánægju gætir meðal leikara Þjóðleikhússins eftir að Tinna Gunnlaugsdóttir þjóðleikhússtjóri tilkynnti á fundi í morgun með þeim um uppsagnir tíu fastráðinna leikara af  33. Markmiðið er að verkefnaráða leikara frekar framvegis. Þeim sem skemmst hafa starfað við leikhúsið verður sagt upp. Meðal þeirra sem hafa starfað styst eru Brynhildur Guðjónsdóttir, sem hlaut frábæra dóma og viðtökur í hlutverki sínu sem Edith Piaf, Atli Rafn Sigurðarson, Rúnar Freyr Gíslason, Kjartan Guðjónsson, Þórunn Lárusdóttir, Sólveig Arnarsdóttir og Nanna Kristín Magnúsdóttir. Boðað hefur verið til fréttamannafundar í leikhúsinu í dag klukkan þrjú og vilja leikarar ekki gefa neinar yfirlýsingar fyrr en eftir þann fund.