Gjaldskrá hækkar ef ekki semst

Gjaldskrá sjálfstætt starfandi sjúkraþjálfara hækkar um þúsundir króna náist ekki nýir samningar við heilbrigðis- og tryggingamálaráðuneytið fyrir kvöldið. Deilt er um svokallað afsláttarþak sem sjúkraþjálfarar segja að hafi lamandi áhrif á starfsemina. Sjálfstætt starfandi sjúkraþjálfarar og fulltrúar heilbrigðis- og tryggingamálaráðuneytisins hafa verið boðaðir á samningafund klukkan tvö í dag í húskynnum Tryggingastofnunar ríkisins en samningar sjúkraþjálfara losna á miðnætti og verður gerð lokatilraun á fundinum í dag til að ná nýjum samningum um gjaldskrá. Ljóst er að ef ekki tekst að semja þurfa sjúklingar að greiða fullt gjald og leita síðan réttar síns hjá Tryggingastofnun. Miðað við núverandi gjaldskrá greiða sjúklingar 2.800 krónur fyrir tímann en komist samningar í uppnám hækkar gjaldið strax upp í að minnsta kosti 3.400 krónur. En gjaldskráin er mismunandi eftir stofum og kann hún að hækka um þúsundir króna með tíð og tíma, að sögn Kristján H. Ragnarssonar, formanns sjálfstætt starfandi sjúkraþjálfara, en þeir eru alls um 250. Tæplega þrjátíu þúsund manns nýta sér þjónustu þeirra og er því ljóst að gjaldskrárhækkun kann að hafa mikil áhrif. Spurður á hverju strandi í samningaviðræðunum segir Kristján að deilt sé um svokallað heildarafsláttarþak. Farið sé fram að sjálfstætt starfandi sjúkraþjálfarar taki á sig heildarafslátt sem þýði í raun að með aukinni þörf á sjúkraþjálfun, sem sé fyrirsjáanleg, vinni sjáflstætt starfandi sjúkraþjálfarar fleiri verk fyrir sama kaup. Það sé því verið að fara fram á að gjaldskrá sjúkraþjálfaranna lækki jafnt og þétt næstu ár. Aðspurður hvaða áhrif þetta kunni að hafa segir Kristján að smám saman þrengist að starfsemi sjálfstætt starfandi sjúkraþjálfara og með tíð og tíma verði hún kæfð algjörlega. Kristján segist aðspurður hæfilega bjartsýnn á að það þokist í samkomulagsátt í viðræðununum í dag. Hann telji að fulltrúar heilbrigðis- og tryggingamálaráðuneytisins þurfi að koma með nýjar tillögur til að hreyfing verði á málinu í dag. Garðar Garðarsson, formaður samninganefndar heilbrigðis- og tryggingamálaráðuneytisins, segir í samtali við fréttastofu að allt verði gert til að reyna að ná nýjum samningum í dag. Menn hafi setið yfir þessu alla helgina og rætt málið innan vinnuhópa með sjúkraþjálfurum.