Síminn: Frestur frá stjórnvöldum?

Hópurinn sem stendur að söfnun hluthafa til kaupa á Símanum íhugar að fá frest hjá stjórnvöldum til að fá ráðrúm til að vinna að málinu. Í dag hafði hópurinn safnað hlutafjárloforðum upp á tólf og hálfan milljarð króna. Þann 6. maí, eftir um þrjár vikur, rennur fresturinn út til að skila inn tilboðum um kaup á Símanum. Það er því stuttur tími sem hópurinn hefur til að ganga frá öllum lausum endum en hópurinn þarf að skila inn útboðsgögnum til Fjármálaeftirlitsins áður en hægt verður að senda inn formlegt tilboð. Afgreiðsla stofnunarinnar á þeim gögnum tekur mislangan tíma að sögn Páls Gunnars Pálssonar, forstjóra Fjármálaeftirlitsins. Agnes Bragadóttir segir að hópurinn muni sækja um frest, ef útlit verði fyrir að hann brenni inni á tíma. Hópurinn hefur leitað til fjölda fjárfesta og fjármálastofnana sem eru, að sögn Agnesar, að skoða málin. Samkvæmt heimildum fréttastofu hafa engin fyrirtæki á vegum Björgólfs Thors nálgast hópinn með formlegum hætti varðandi þátttöku í kaupunum á Símanum og er ekkert útilokað í þeim herbúðum. Finnur Ingólfsson, forstjóri VÍS, neitaði fréttastofu um viðtal og það eina sem hann vildi láta hafa eftir sér er að VÍS ætlaði sér ekki að verða leiðandi aðili í hópi þeirra fjárfesta sem munu bjóða í Símann. Ef hins vegar fjárfestar leituðu eftir samstarfi við VÍS um kaup á Símanum þá yrði það skoðað. Jón G. Hauksson, ritstjóri Frjálsrar verslunar, segir að eflaust fagni stóru fjárfestarnir þessari breiðfylkingu. Þetta líti hins vegar nokkuð kindarlega í hans augum því haft hafi verið á orði að stóru fjárfestarnir séu „rumpulýður“ sem fremji hvert þjóðarránið á fætur öðru. „Ætlar nú þetta nýja fjárfestingafélag að fara að vinna með þessum rumpulýð?“ spyr Jón Og Jón telur að sala Símans sé í uppnámi og því eigi að hætta við hana. Best og réttlátast væri að senda hlutabréf í fyrirtækinu í pósti til fólksins í landinu.  Jón Sveinsson, formaður einkavæðinganefndar, segir að ef erindi um frestun á sölu Símans berist þá verði það tekið til umfjöllunar hjá einkavæðinganefnd.