Falsaðar beiðnir í umferð frá Og Vodafone

Upp hefur komist um falsaðar beiðnir frá Og Vodafone. Grunur leikur á að óprúttnir aðilar hafi þær undir höndum og nýti þær til þess að taka út vörur hjá birgjum fyrirtækisins. Og Vodafone beinir þeim tilmælum til afgreiðslufólks að það sýni varúð þegar beiðnum frá fyrirtækinu er framvísað og leiti upplýsinga hjá því um hvort þær séu ófalsaðar. Beint símanúmer Og Vodafone er 599 9000.

Ekki er um góða fölsun að ræða og má sjá hrjúfan frágang á skurði sem og ógreinilegan lit á beiðnunum. Í tilkynningu frá Og Vodafone segir að beiðnir fyrirtækisins séu í tvíriti, frumritið hvítt og afritið á heiðgulum pappír. Fölsuðu beiðnirnar eru hins vegar í ógreinilegum gulum lit.

Málið hefur verið kært til lögreglu og stendur rannsókn yfir.