Fleiri Norðmenn fá hermannaveiki

Heilbrigðisyfirvöld í Noregi hafa verulegar áhyggjur af hermannaveikifaraldrinum sem kominn er upp í bænum Friðriksstað skammt sunnan við Osló. Um 30 manns hafa veikst og þar af hafa fimm látist. Veikin gaus upp á Østfold-svæðinu um helgina en nú leikur grunur á að hún sé að skjóta upp kollinum víðar. Þannig var kona lögð inn á sjúkrahús í Drammen í gær sem er mun nær Osló og er staðfest að hún er með hermannaveiki. Það sem veldur norskum yfirvöldum mestu hugarangri er að uppspretta veikinnar hefur ekki fundist og er allt kapp lagt á að finna hana, en athyglin beinist fyrst og fremst að stórum byggingum í Friðriksstað og nágrenni. Nokkur uggur er í norskum almenningi; þannig var stórt verslunarhús í Friðriksstað meira og minna mannlaust í gær eftir að orðrómur komst á kreik um að fólk hefði smitast eftir komu þangað. Haraldur Briem sóttvarnarlæknir segir að Landlæknisembættið geri engar sérstakar ráðstafanir vegna hermannaveikinnar. "En ef einhver er að koma hingað frá þessu svæði og fær einhver einkenni, höfuðverk, hita, slappleika og hósta, á hann auðvitað að leita læknis," segir Haraldur. Hann leggur áherslu á að hermannaveikin smitist ekki manna milli þannig að engin hætta sé á að veikin breiðist út. "Þetta er í sjálfu sér alls ekki sjaldgæfur sjúkdómur, það er bara við svona kringumstæður þegar þetta nær að magnast upp og verða að hópsýkingu að veikin vekur sérstaka athygli," segir hann. Hér á landi hafa orðið einstaka tilfelli um hermannaveiki árlega en hópsýkingar hafa ekki komið upp síðan fyrir tíu til fimmtán árum. "Þá komu upp nokkur sýkingarvandamál á Landspítalanum og það tókst að finna bakteríur í sturtuhausum sem gátu skýrt málið og menn komust fljótt fyrir þetta," segir Haraldur Briem sóttvarnarlæknir.