Gripinn eftir glæfraakstur

Ökumaður með barn í bíl sínum var í gær stöðvaður í Borgarnesi eftir glæfraakstur í Norðurárdal. Lögreglan á Hólmavík mældi manninn á 146 kílómetra hraða en ökumaðurinn sinnti ekki stöðvunarmerkjum og gaf í þegar hann varð var við lögregluna. Ökumaðurinn stofnaði lífi sínu og annarra í stórhættu með akstrinum, en hann var stöðvaður af lögreglunni í Borgarnesi. Brotið er litið mjög alvarlegum augum, ekki síst með tilliti til þess að barn var í bílnum. Ekki er ólíklegt að maðurinn sæti ákæru þar sem talið er að brot hans geti varðað við almenn hegningarlög.