Hrærð yfir fjölmenninu

Heimamenn mættu flestir hverjir á minningarathöfnina í gærkvöldi auk fjölda gesta. Enda fór svo að fleiri komu á athöfnina en skipuleggjendur athafnarinnar höfðu átt von á, og það þrátt fyrir að nokkrir þeirra sem ætluðu að mæta komust ekki þar sem flug féll niður seinni partinn í gær.

Jóhanna Guðrún Kristjánsdóttir, ein þeirra sem skipulögðu minningarathöfnina, segist hrærð yfir því hversu margir komu, ekki aðeins Flateyringar heldur einnig nágrannar þeirra, ráðherrar og fleiri. Flateyringum hafi verið sýndur mikill heiður, ekki síst af hálfu Landhelgisgæslunnar en þyrlur hennar lentu á nákvæmlega sama stað og þær lentu á þegar þær komu til hjálparstarfsins fyrir tíu árum síðan.

Fjöldi manna tók þátt í athöfninni með ýmsum hætti, þeirra á meðal frú Vigdís Finnbogadóttir, fyrrum forseti, sem flutti ávarp.

"Þetta rifjast allt upp á örskotsstund sem gerðist hér fyrir tíu árum, sem var svo hörmulegt að það var eiginlega ekki hægt að hugsa þá sögu til enda," sagði frú Vigdís í viðtali við Þorstein J. "En það sem mér þykir vænt um þegar ég kem hérna núna tíu árum síðar er að sjá hvernig sárin foldar gróa. Heimamönnum hefur tekist að gera staðinn þannig að minningin er lifandi hér en það er reynt að gera allt í kringum minninguna þannig að það er hægt að horfast í augu við hana.

Sagði frú Vigdís í viðtali við Þorstein J. Á sama tíma og atburðanna var minnst á Flateyri var fullt út úr dyrum í Neskirkju í Reykjavík þar sem fór fram minningarathöfn um þá sem létust í snjóflóðinu á Flateyri.