Segja Stöð 2 hafa rænt Fischer

Framganga Páls Magnússonar fréttastjóra Stöðvar 2 við komu Bobby Fischers og unnustu hans Miyoko Watai til Reykjavíkurflugvallar í fyrrakvöld er harðlega gagnrýnd í yfirlýsingu frá Einari S. Einarssyni, sem er í stuðningsnefnd Fischers. Í yfirlýsingunni segir að eftir að Fischer hafi verið kominn í mótökubílinn hafi Stöðvar 2 menn nánast rænt Fischer um stundarsakir en komið með hann aftur á vettvang þegar allar sjónvarpsstöðvar hefðu verið búnar að pakka saman og fara. "Það hlítur að vera algjört einsdæmi að fréttamiðill taki atburðarrásina í eigin hendur af skipuleggjendum og stýri framvindu atburða til að geta setið einir að hitunni," segir í yfirlýsingunni. Til stóð af hálfu stuðningnefndar að heilsa Fischer og veita honum blóm og ríkisfangsbréf við þetta tækifæri. Ekkert varð úr því þegar Geir Jón Þórisson yfirlögregluþjónn kom úr einkaþotunni með þau skilaboð að Fischer talaði ekki við neinn vegna mikillar þreytu. Í yfirlýsingu Einars segir að Geir Jón hafi gert þetta samkvæmt fyrirmælum Páls. Spurður segir Geir Jón það hafa verið ósk Fischers sjálfs og allra sem í þotunni voru að hann talaði ekki við fjölmiðlamenn við þetta tækifæri. Á blaðamannafundi á Hótel Loftleiðum staðfesti Bobby að það hefði verið hans ákvörðun og allra hlutaðeigenda að hann talaði hvorki við fjölmiðlamenn né stuðningsnefndina við komu sína þar sem hann hafi verið dauðþreyttur. Heimildarmaður Fréttablaðsins sem er einn af stuðningsnefndarmönnum sagði að Fischer hefði ekki verið svo þreyttur þegar þeir loks hittu hann á Hótel Loftleiðum. Honum þykir það undrun sæta að ef hlífa átti Fischer við amstur vegna þreytu að menn skyldu þá rúnta með hann uns fjölmiðlar væru farnir svo hann gæti farið aftur á vettvang í viðtal hjá Stöð 2. Hann sagði ennfremur að stuðningsnefndin væri fyrst og fremst ánægð með að Fischer væri kominn en harmaði hve lítil skil sumir fjölmiðlar gátu gert þessum viðburði.