Undirbúa árásir á uppreisnarmenn

Bandaríski herinn undirbýr harðar árásir á uppreisnarmenn í Írak. Vígamenn hóta að ráðast á olíuleiðslur láti Bandaríkjamenn sverfa til stáls í borginni Najaf. Barist var í mörgum borgum í Írak í dag. Yfir 350 uppreisnarmenn eru dánir. Í Najaf er ástandið verst, götur eru auðar, almenningur þorir ekki út fyrir hússins dyr og Bandaríkjamenn hafa lokað heilu hverfunum. Þeir óku um Najaf í dag og hvöttu íbúa til að flýja, því þeir undirbúa nú harðar árásir á uppreisnarmenn. Mestu bardagarnir eru í miðbænum en uppreisnarmenn hafa leitað skjóls á heilögum stöðum sjíta múslima. Varaforseti íröksku bráðabirgðastjórnarinnar vill hins vegar að bandaríski herinn hverfi úr borginni, en vill í staðinn að íraskar sveitir sjái um að koma á friði. Í Bagdad, Mara og Kut dóu 30 og yfir 200 særðust í átökum í gær. Átökin hafa breiðst út síðustu daga og virðast fleiri en uppreisnarmenn hafa gripið til vopna gegn herliðinu. Skæruliðar beita allt frá sjálfsmorðssprengingum til mannrána. Sjítaklerkurinn Moqtada al-Sadir virðist njóta æ meiri stuðnings.