Sænskum börnum haldið á Gaza

Palestínskur maður hefur numið á brott fimm börn sín sem hann á með sænskri konu og dvelur nú með þau í Gaza-borg. Brottnám barnanna er ólögmætt enda hefur móðir þeirra og fyrrverandi eiginkona mannsins, Elisabeth Krantz, forræði yfir þeim. Imsail Nowajah tók börnin af heimili móður sinnar í Kungsbacka 4. júní undir því yfirskyni að hann ætlaði með þau í frí til Egyptalands. Hann hefur hins vegar dvalið með þau í Gaza-borg undanfarna tvo mánuði. Sænsk og palestínsk yfirvöld vinna að lausn málsins en mikil óvissa ríkir um framvinduna vegna þess ófremdarástands sem ríkir á heimastjórnarsvæðunum um þessar mundir.