Öryggisviðbúnaður aukinn

Öryggisviðbúnaður hefur verið aukinn á ellefu flugvöllum og í tveimur höfnum til viðbótar í Bandaríkjunum. Tom Ridge, yfirmaður heimavarnaráðuneytis Bandaríkjanna, segir þetta gert í kjölfar rannsóknar á gögnum Al-Kaída. Þau gögn voru haldlögð í júlí síðastliðnum en eru sögð vera að mestu leyti frá þeim tíma þegar hryðjuverkasamtökin undirbjuggu árásirnar 11. september 2001. Nú er sérstaklega fylgst með að erlendir ríkisborgarar yfirgefi landið á tilsettum tíma. Fingraför og ljósmyndir eru teknar af erlendum ferðamönnum þegar þeir koma til Bandaríkjanna. Breska lögreglan greindi frá því í gærkvöldi að þrettán manns hafi verið handteknir í London og þremur nágrannasveitarfélögum í gær á grundvelli laga um varnir gegn hryðjuverkum. Mennirnir eru sagðir á á tvítugs- og fertugsaldri, allir af asískum uppruna, en ekki liggur fyrir um ríkisfang þeirra.