Aldrei séð Bleika pardusinn

Söng- og leikkonan Beyonce Knowles hefur viðurkennt að hafa aldrei horft á kvikmynd með Bleika pardusnum. Knowles er um þessar mundir að leika í nýrri útgáfu af pardusnum með Steve Martin í hlutverki lögreglufulltrúans Clouseau, sem Peter Sellers lék svo eftirminnilega á árum áður. Myndin kallast einfaldlega The Pink Panther. Knowles fer með hlutverk Xania sem er kynþokkafull söngkona. "Þegar ég sá handritið fannst mér það mjög fyndið og ég var einnig spennt vegna þess að ég er mikill aðdáandi Steve Martin," sagði hún. "Hann er mikill fagmaður og frekar alvarlegur þegar hann er ekki að leika Clouseau. En þegar upptökuvélin fer af stað veit maður aldrei hvað gerist." Knowles, sem sló í gegn með hljómsveitinni Destiny´s Child, hefur áður leikið í myndunum Austin Powers in Goldmember og The Fighting Temptations.