Pink út, 50 Cent inn

Hætt hefur verið við seinni tónleika Pink á Íslandi sem áttu að fara fram í Laugardalshöll 11. ágúst. Tónleikar 50 Cent, sem áttu að fara fram í Egilshöll á sama degi, hafa verið færðir þangað í staðinn, enda orðið ljóst að plássið þar hefði verið of mikið fyrir rapparann til þess að fylla. Tónleikahaldarar komust að þeirri sameiginlegu niðurstöðu að Ísland rúmi ekki tvenna stóra tónleika sama dag. Þeir sem höfðu verslað sér miða á seinni tónleika Pink geta nú notað þá sem inngöngumiða á fyrri tónleikana, sem verða haldnir 10. ágúst, eins og alltaf hefur staðið til. Enn eru örfáir miðar eftir til sölu, bæði í verslunum Skífunnar og á vefsvæðinu midar.is. Tónleikar 50 Cent rúma nú aðeins 5.500 miða og eru því örfáir miðar eftir, þar sem þegar er búið að selja tæplega 4000 miða. Þeir sem höfðu tryggt sér miða inn á V.I.P. svæðið á tónleika 50 Cent hafa svo forgang upp í stúku, vilji þeir sitja þar. Ekki verður selt sérstaklega upp í stúku. Þar sem þar er takmarkað sætaframboð gildir sú regla að þeir fá sætin sem ná þeim. Iceland Express verður með sérstakt tilboð á næstu tveimur vikum og býður miða á 4.500 krónur í stæði.