Forgotten Lores og Hjálmar saman

Í Fókus, sem fylgir DV í dag, er hægt að finna allt sem er að gerast í skemmtana-, tónlistar og bíóheimum helgarinnar, m.a. reggí- og rapptónleikana í Rússlandi í Klink og Bank í kvöld. "Þetta verður bullandi fjör. Við í Forgotten Lores spilum, Hjálmar líka, Ant Lew og Maximum taka þrjú lög og Flökkudiskóið Sound System, sem eru Dj Kári og Árni Sveins að reggíast, sér um tónlistina þess á milli," segir Gísli Galdur, einn meðlima rappsveitarinnar Forgotten Lores. Í kvöld verður þessi taktfasta veisla haldin í tónlistarsalnum í Klink og Bank, Rússlandi. Hjálmarnir eru auðvitað ein vinsælasta tónleikasveit landsins um þessar mundir og ætti að fara vel með rappinu. Þá hefur salurinn einnig reynst vel, þar voru m.a. haldnir einir sveittustu tónleikar ársins með Peaches. Ekki hafði mikið sést til Forgotten Lores í nokkurn tíma þegar hún kom sterk inn á Airwaves og hélt eina af bestu tónleikum hátíðarinnar. Gísli Galdur segir þetta í rauninni vera Forgotten Lores Band. "Við erum fjórir hljóðfæraleikarar sem spilum með þeim en erum ekki í hinni eiginlegu hljómsveit. Við erum búnir að vera að pæla í þessu lengi. Setja saman svona band, kannski svipað og Roots. Síðan ákváðum við að drífa í því fyrir Airwaves, sérstaklega af því að okkur bauðst svo gott spott, Nasa á besta kvöldi." Framlengingarbandið státar af Gísla á trommur, Leifi Þór á hljómborð, Sölva á bassa og Sigga á gítar. Þetta kvöld á Airwaves fengu strákarnir í FL sér bjór eftir tónleikana og hlustuðu á hljómsveitina sem spilaði á eftir, Hjálma. Þeir hrifust af henni og fannst tónlistin passa vel við sig. Þá kviknaði hugmyndin að tónleikunum í kvöld. "Ég veit ekki hvort þeir þekktu Forgotten Lores fyrir þetta kvöld en þeir voru til í þetta. Í góðu stuði." Þetta kvöld var örlagaríkt fyrir Forgotten Lores. Í salnum var einnig staddur hópur af Bandaríkjamönnum sem hreifst mjög af sveitinni. Þess vegna báðu þeir hana um að spila í jólapartý fyrir fyrirtækjatoppa, sem verður í Washington í síðustu viku. "Það verður þó ekki sveitt gigg eins og í kvöld. Það kostar þúsundkall inn en gæti verið að þeir fyrstu fái bjór eða eitthvað. Við ætlum að reyna að plögga það," segir Gísli. Dagskráin hefst klukkan níu. Rússland er Brautarholtsmegin í Klink og Bank.