Ruglið um ruglið

Svar við skrifum í Fréttablaðinu - Valgerður Sverrisdóttir viðskiptaráðherra Leiðari Fréttablaðsins mánudaginn 6. desember "Ruglið í Berlingske Tidende" var kostuleg lesning. Það hlýtur að vera umhugsunarefni fyrir ritstjórn þess ágæta blaðs, sem nú státar af mestum lestri á dagblaðamarkaði, að slíkur leiðari skuli settur fram. Höfundur leiðarans er Hafliði Helgason blaðamaður, sem skrifar að jafnaði um viðskiptamál. Fjallar leiðarahöfundur þar um skrif í danska blaðinu um útrás íslenskra fjárfesta, m.a. kaup á Magasin du Nord. Ekki verður farið nánar út í þau mál hér en athygli vekur hvernig Hafliði Helgason fjallar um undirritaða. Hann segir: "Óskiljanlegra er þó svar viðskiptaráðherra við vangaveltum Berlinske Tidende á hættu á skammtímasjónarmiðum vegna stórs eignarhluta starfsmanna KB banka í bankanum. Valgerður Sverrisdóttir kýs að svara ekki spurningum um áhættu í bankakerfinu, en segir málið stórt í samtali við fréttamann Stöðvar 2, svo stórt að það krefjist nánari athugunar." Leiðaraskrif Hafliða byggja síðan alfarið á þessu sem haft er eftir mér í fréttum Stöðvar 2. Það er rétt að fréttamaður Stöðvar 2 bað um viðtal við mig vegna skrifa BT þegar ég hitti hann á göngum Alþingis. Ég sagði honum að ég þyrfti að kynna mér málið fyrst enda væri það stórt. Það er hins vegar í mínum huga algerlega með ólíkindum að leiðarahöfundur Fréttablaðsins skuli fjalla um "svör" mín með þeim hætti sem hann gerir. Svör mín voru engin. Ég neitaði viðtali við Stöð 2 þar sem ég hafði ekki kynnt mér nægilega vel efni þeirrar fréttar sem þar var verið að vinna. Blaðamaður Fréttablaðsins gerði hins vegar enga tilraun til að hafa samband við mig vegna þessa máls, og ræða það við mig. Hann hringdi ekki eitt símtal til að ræða málið og upplýsa það, eins og ég hélt að starf hans fælist í. Hann byggir hins vegar hálfan leiðara á því sem ég sagði ekki í fréttum Stöðvar 2. Í leiðara Hafliða sagði síðan: "Með þessu rær ráðherrann undir með þeim sjónarmiðum að danskir fjölmiðlar hafi með rangfærslum sínum uppgötvað nýjan sannleik um íslenska fjármálakerfið. Ráðherra viðskipta á að vita betur en að gefa undir fótinn sögusögnum sem geta dregið úr trúverðugleika kerfisins." Það eru engar smá ásakanir sem leiðarahöfundur ber á viðskiptaráðherra. Vegna þess sem ráðherra sagði ekki! Og þrátt fyrir alvarleika málsins að mati blaðamannsins reyndi hann ekki með einu símtali að nálgast ráðherrann til að bera málið undir hann. Geta þessi vinnubrögð verið Fréttablaðinu samboðin? Nú kann vel að vera að Hafliða Helgasyni hafi þótt sem fréttamaður Stöðvar 2 hafi gengið fulllangt í umfjöllun sinni um skrif danskra fjölmiðla um íslenska banka. En það verður hann að eiga við fréttastofu Stöðvar 2 en ekki mig. Ekki veit ég hvað býr að baki skrifum Hafliða Helgasonar frá síðasta mánudegi. Kannski vill hann sýna íslenskum fyrirtækjum að hann standi með þeim þegar fjölmiðlar sækja að og reyni þannig að upphefja sjálfan sig. Blaðamaðurinn getur hins vegar ekki byggt leiðaraskrif sín á jafn veikum grunni og síðastliðinn mánudag. Ég veit, eftir símaviðtal við leiðarahöfund í gær, að Fréttablaðið muni telja sig hafa viðhaft fagleg vinnubrögð við leiðaraskrifin enda hef ég lært að ef eitthvað er ólíklegra en að stjórnmálamaður viðurkenni mistök, þá mun það vera það að blaðamaður geri slíkt.