4-6 milljarðar í einkaneyslu

Bankarnir lánuðu almenningi fimmtíu og fimm milljarða króna frá því nýju húsnæðislánin komu til sögunnar í síðari hluta ágúst til loka október. Valgerður Sverrisdóttir viðskiptaráðherra segir ekki hægt að neita því að bankarnir séu full glannalegir í útlánum. Til samanburðar voru greidd upp lán fyrir níu milljarða frá janúar og fram til 23. ágúst En þótt Íbúðalánasjóður tapi, græðir ríkið vegna þess að gera má ráð fyrir að stimpilgjöld til ríkisins á þessum rúmu tveimur mánuðum, vegna nýju húsnæðislánanna sem nema einu og hálfu prósenti af öllum lánum, séu um áttahundruð milljónir. Og bankarnir taka um eitt prósent í lántökugjöld sem gerir þá um 550 milljónir sem að þeir hafa fengið í sinn hlut. Þeir sérfræðingar sem rætt var við segja að lauslega megi ætla að 4 til 6 af þessum 55 milljörðum sem voru lánaðir út á tæpu tveggja mánaða tímabili, hafi runnið beint til einkaneyslu og vara við þenslunni sem er þessu samfara. Á Alþingi í gær lýstu nokkurir þingmenn stjórnarandstöðu áhyggjum af málinu. viðskiptaráðherra svaraði því til að þetta stóraukna framboð á lánsfé væri áhyggjuefni en bæði Seðlabankinn og Fjármálaeftirlitið fylgdust grannt með ástandinu. Varað hefur verið við því að bankakreppa gæti orðið í kjölfarið líkt og gerðist til að mynda í Noregi. Valgerður Sverrisdóttir segist taka undir það að þróun útlána sé glannaleg. Hún komi til af því að bankarnir fari í samkeppni og stígi stór skref í þeim efnum, en vonandi ráði þeir við það. Á endanum sé það samt einstaklingurinn sem verði að passa sig að reisa sér ekki hurðarás um öxl.