Vel heppnað útboð SÍF

SÍF hefur lokið sölu á nýju hlutafé að andvirði 20,2 milljarðar króna. Stærstur hluti nýja hlutafjárins var seldur til stærstu hluthafa félagsins sem höfðu skuldbundið sig til kaupa áður en til útboðsins kom. Stærstu hluthafarnir; Ker hf, VÍS, Samvinnulífeyrissjóðurinn og KB banki, keyptu hlutafé fyrir samtals 15,4 milljarða. Lífeyrissjóðir og íslenskir fagfjárfestar voru á meðal þeirra sem keyptu það sem eftir stóð af nýja hlutafénu. Nokkur umframeftirspurn var eftir bréfunum en alls sóttust fjárfestar eftir að kaupa hlutafé fyrir 8,4 milljarða en fengu að kaupa fyrir 4,8 milljarða. Hlutafjáraukningin kemur í kjölfar kaupa SÍF á franska matvælafyrirtækinu Labeyrie fyrir 29 milljarða króna. Í útboðsgögnum var gert ráð fyrir að gengi á nýja hlutfénu yrði á bilinu 4,5 til 5,5. "Við erum mjög glaðir og sáttir við ferlið og erum ánægðir með hvernig til tókst. Við viljum líka þakka fjárfestum fyrir stuðning í þessu verkefni okkar sem við teljum mjög áhugavert. Við erum sannfærðir um að þetta reynist okkur hagfellt og farsælt," segir Ólafur Ólafsson, stjórnarformaður SÍF. KB banki sá um framkvæmd útboðsins og segir Örvar Kærnested, forstöðumaður fyrirtækjaráðgjafar, að ánægja ríki með útboðið og þann áhuga sem fjárfestar hafi sýnt verkefninu.