Útvarpslestur í Kópavogi

Hlustendur Morgunvaktarinnar í Útvarpinu þekkja hljómmikla og yfirvegaða rödd Jóns Ásgeirs Sigurðssonar. Hann hefur upp raust sína laust eftir klukkan hálf átta á morgnana og skýrir frá skrifum leiðarahöfunda heimsblaðanna á hverjum morgni. Öfugt við flesta starfsmenn Morgunvaktar og annarra þátta Útvarpsins situr Jón ekki í hljóðstofu í Efstaleiti 1 heldur heima hjá sér í Kópavoginum. Og reyndar situr hann ekki heldur stendur. "Margrét Pálsdóttir, málfarsráðunautur, ráðlagði mér að standa. Röddin fær betri hljómbotn þegar ég stend en það tekur hana víst tvo tíma að vakna." Það er af praktískum ástæðum sem Jón Ásgeir kýs að vinna heima svo snemma morguns. "Það sparar mér tíma að hafa þetta svona. Ég get vaknað klukkan sex og byrjað að vinna í stað þess að vakna rúmlega fimm og fara upp í Útvarp." Hann segist alltaf vera fullklæddur við leiðaralesturinn og hafi fyrir reglu að fá sér morgunverð áður en útsending hefst. "Ég reyndi fyrst að gera þetta á fastandi maga en það virkaði ekki nógu vel." Það er engin nýlunda fyrir Jón Ásgeir að framleiða útvarpsefni heima hjá sér, hann var fréttaritari Útvarpsins í Bandaríkjunum í níu ár og hafði sama hátt á þar þegar hann flutti Íslendingum tíðindi af gangi mála vestan hafs. Þegar leiðaralesturinn er afstaðinn lítur Jón Ásgeir í íslensku dagblöðin og skondrast svo yfir í Sundlaug Kópavogs þar sem hann syndir fimm hundruð metrana. Þaðan liggur leiðin svo í höfuðstöðvarnar í Efstaleitinu á ritstjórnarfund sem hefst 9.15. Auk leiðaralestursins á Morgunvaktinni vinnur hann efni í Spegilinn og sér um Helgarvaktina sem er á Rás 1 á sunnudögum.