Svartur húmor

Friðagæslan - Böðvar Þór Unnarsson Menn geta notað margar aðferðir til að vera fyndnir. Svartur húmor er ein þeirra og ef atburður er litaður með honum getur hann orðið alveg drep-fyndinn. Ég hef reyndar aldrei heyrt að hann væri Íslendingum mjög tamur. Það var ekki fyrr en nú á dögunum þegar ég las um heimkomu ,,strákanna okkar" frá Afganistan að ég uppgvötvaði að svo er. Eftir að hafa særst í sprengjuárás fengu þeir frí frá friðargæslunni og komu til landsins íklæddir svörtum bolum sem á stóð ,,Chicken street - shit happens". Þeir vildu meina að áletrun þessi væri ,,svartur íslenskur húmor" og væri viðleitni félaga þeirra til að hjálpa þeim að komast yfir áfallið sem árásin olli þeim. Auk tilræðismannsins létust í þessari árás ellefu ára gömul afgönsk stúlka og 23 ára kona frá Bandaríkjunum. Chicken Street er heitið á götunni í Kabúl þar sem árás þessi átti sér stað. Það gæti vel gerst að seinna meir yrði enn frekari þörf fyrir svona svartan húmor. Segjum svo að íslensku friðargæsluliðarnir í Afganistan þyrftu einhverntíma aftur að skreppa í kaupstaðinn eftir teppi. Ef svo illa vildi til að yfirmaður þeirra ætti í erfiðleikum með að finna rétta litinn á forstofuna og tefðist um klukkutíma og eftir drykklanga stund birtast Afgani með sprengjukorn til að gera þeim glennu með eftirfarandi afleiðingum: Hann sprengdi sjálfan sig í loft upp ásamt, ja segjum tólf ára dreng. Höfum stúlku frá Ástralíu í pakkanum til að hafa örlitla fjölbreytni í þessu. Hendum svo inn þriggja barna móður með tveggja, sex og átta ára gömul börn sín á leið í skólann. Auk þess mundi líka einn af okkar ágætu íslensku friðargæsluliðum særast illa í árásinni. Ef þetta skyldi nú gerast næst þegar strákarnir skreppa í verslunarferð er ég með tillögu að áletrunum á bolina þeirra. Væri þá ekki rétt að nota okkar ástkæra ylhýra. Áletranirnar gætu þá orðið annaðhvort ,,Létt og kátt í Kabúl", eða ,,Alltaf fjör í Afganistan". Þetta mundi vera vel til þess fallið að létta undir með þeim sem ættu um sárt að binda. Ég mundi auk þess leggja til að þessu yrði snarað á afgönsku og ensku til þess að allir hlutaðeigandi aðilar fengju nú tækifæri til að jafna sig með hjálp hins svarta íslenska húmors. Höfundur er námsmaður.