Bjóða al-Sadr sakaruppgjöf

Átta manna sendinefnd frá þjóðarráðstefnunni í Írak mætti til borgarinnar Najaf í gær og lagði sáttartillögu fyrir sjítaklerkinn Moqtada al-Sadr. Sáttatillagan felur í sér sakaruppgjöf fyrir al-Sadr ef hann leggur niður vopn, dregur lið sitt frá Imam Ali-helgidómnum og gengur til liðs við Íraksstjórn. Áætlað var að 60 manna sendinefnd færi til Najaf en fækkað var í henni af öryggisástæðum. Talsmenn al-Sadr segjast fagna sendinefndinni en tilboðið sé ótækt. Helgidómurinn verði að vera í varðveislu réttmætra trúarleiðtoga. Ráðstefnan var lengd um einn dag, vegna farar sendinefndarinnar að því er talið er.