Schröder heimsækir gröf föður síns

Gerhard Schröder kanslari Þýskalands mun heimsækja gröf föður síns í fyrsta sinn þegar hann fer í opinbera heimsókn til Rúmeníu í dag. Fritz Schröders var hermaður í þýska hernum í síðari heimsstyrjöldinni og var hann felldur af óbreyttum borgurum í litlu þorpi í Transylvaníu í október 1944 en Þjóðverjar hörfuðu þá undan sókn Sovétmanna. Faðir kanslarans var ófaglærður verkamaður og var kallaður í herinn árið 1940. Gerhard Schröder er fæddur 7. apríl 1944, aðeins sex mánuðum áður en faðir hans féll. Lengi vel voru afrif Fritz hulin fjölskyldu hans en systir kanslarans, Gunnhild Kamp-Shcröder, fann grafreit föður þeirra árið 2001 með aðstoð Rauða krossins. Forsætisráðherra Rúmeníu, Adrian Nastase, bauð kanslaranum sérstaklega að heimsækja gröf föður síns en ferð Schröders til Rúmeníu og Búlgaríu nú er þó fyrst og fremst í þeim tilgangi að styrkja efnahagsleg tengsl Þýskalands við löndin sem bæði banka á dyr Evrópusambandsins.