Gildistöku vegabréfalaga frestað

Forseti Bandaríkjanna skrifaði í gær undir lög sem fresta gildistöku laga um vegabréf með lífkenni, um eitt ár fyrir þau lönd sem þurfa ekki áritun til Bandaríkjanna, en áður hafði reglugerðin verið samþykkt árið 2002. Með þessu frestast gildistaka laganna til 26. október 2005, en þá þurfa öll ný vegabréf að innihalda lífkenni. Þetta kemur fram í frétt frá sendiráði Bandaríkjanna á Íslandi. Þar segir að framlengingin hafi verið nauðsynleg til að komast hjá töfum á ferðalögum og til að gefa alþjóðasamfélaginu meiri tíma til að þróa betri leiðir til að framleiða öruggari vegabréf með lífkennum. Upphaflega dagsetningin fyrir gildistöku laganna var 26. október 2004. Til að mæta öryggiskröfum bandarískra stjórnvalda munu allir sem ferðast til Bandaríkjanna frá og með 30. september þurfa að gefa fingraför og vera myndaðir við komuna til Bandaríkjanna, samkvæmt svokallaðri US-VISIT áætlun. Gildistöku skilyrða um tölvulesanleg vegabréf hefur hins vegar ekki verið frestað þannig að allir sem ferðast til Bandaríkjanna án áritunar frá og með 26. október næstkomandi þurfa að framvísa vegabréfum sem eru tölvulesanleg.