2 milljónir í flóttamannabúðum

Fimmtíu þúsund manns hafa látið lífið í átökum í Súdan og hátt í tvær milljónir manna hafast við í flóttamannabúðum. Íslensk kona sér um daglegan rekstur heilsugæslu í flóttamannabúðum í Darfúr fyrir Alþjóða Rauðakrossinn.  Hátt í tvær milljónir manna eru í flóttamannabúðum eða á vergangi. Hungursneyð og sjúkdómar herja á fólkið. Hjördís Guðbjörnsdóttir, sem sér um rekstur heilsugæslu Alþjóða Rauða krossins í Abu Sock í Darfúr-héraði er ánægð með aðstæður í búðunum en þar hafast fimmtíu þúsund við. Hún segir fólk fá skjól yfir höfuðið og mat og að rekstur heilsugæslu hafi nýhafist á svæðinu. Hjördís segir aðstæðurnar að sjálfsögðu dapurlegar en að fæstir flóttamannanna hafi búið við betri aðstæður áður. Darfúr-hérað sé fátækt og fólkið því ekki komið úr neinu ríkidæmi. Aðspurð um öryggi segir Hjördís að flóttamenn og starfsfólk búðanna sé eins öruggt og hægt sé að vera á slíku svæði. Hún sjálf finni alla vega ekki til neins óöryggis eða hræðslu. Hjördís segir auðvitað alltaf þörf fyrir auknar fjárveitingar en hún veit ekki hvernig þau mál standa í dag. Aðspurð um skipulagið segir hún það vera einstaklega gott og að daglegt líf gangi vel.