Al-Kaída hagnast á upplýsingaleka

Tilraunir Bandaríkjastjórnar til að réttlæta viðvaranir við hryðjverkaógn í síðustu viku kom að öllum líkindum í veg fyrir frekari handtökur á meðlimum Al-Kaída hryðjuverkasamtakanna í Bandaríkjunum, Evrópu og Pakistan. 1. ágúst tilkynntu bandarísk stjórnvöld að grunur léki á að Al-Kaída ætlaði að gera árásir á fjármálstofnanir í Bandaríkjunum. Ekki var vitað hvaðan upplýsingarnar komu en nokkrum dögum síðar voru nokkrir grunaðir hryðjuverkamenn handteknir í Bretlandi. Tveimur dögum seinna lá ljóst fyrir að Bretar hefðu fengið upplýsingar um mennina frá Pakistan en í júlímánuði handtóku Pakistanar háttsettan hryðjuverkamann að nafni Mohammed Naeem Noor Khan. Í fórum hans fannst mikið af upplýsingum um aðra hryðjuverkamenn og áætlanir þeirra. Pakistanar héldu lengi vel handtöku Khans leyndri og þeir leyfðu honum að halda áfram að hafa samband við samráðsmenn í von um að fá fleiri upplýsingar um þá. Upplýsingarnar frá Khan komu að gagni og sífellt fleiri nöfn hryðjuverkamanna komu fram. Þegar í ljós kom að Bandaríkjastjórn hefði byggt á fjögurra ára gömlum upplýsingum um árásir á fjármálastofnanir vöknuðu spurningar um hvort viðvarirnar ættu sér pólitískar rætur. Þrýstingur á bandarísk stjórnvöld um að upplýsa ástæðurnar fyrir auknum viðbúnaði jókst og það var þá sem háttettir embættismenn láku því að Khan hefði náðst í Pakistan. Þegar þessar upplýsingar komu fram varð ljóst að ekki væri hægt að nota Khan áfram sem uppljóstrara. Eftir að nafn Khans var komið fram í fjölmiðlum hættu Al-Kaída menn að hafa samband sín á milli. Bretar héldu á sama tíma upplýsingum um handtökurnar í Pakistan leyndum og neituðu að gefa upp hvaðan upplýsingarnar um þrettán grunaða hryðjuverkamenn í Bretlandi hefðu komið. Nokkrir þingmenn í Bandaríkjunum eru æfir yfir því að bandarísk stjórnvöld skyldu láta síkar upplýsingar frá sér fara því fjölmargir hryðjuverkamenn í Evrópu og í Bandaríkjunum kunni að hafa komist undan.