Lofa að fara varlegar en áður

Bandarískir hermenn í Afganistan munu fara sér varlegar í framtíðinni og taka aðeins meira tillit til heimamanna en hingað til. Þessu lofaði David Barno, hershöfðingi og æðsti yfirmaður Bandaríkjahers í Afganistan, á fundi með Hamid Karzai, forseta Afganistans. Afganar hafa, líkt og Írakar, kvartað undan harkalegum aðgerðum bandarískra hermanna, sem hafa sparkað upp hurðum og handjárnað furðulostna Afgana í leit sinni að uppreisnarmönnum. Aðgerðir Bandaríkjamanna eiga sér gjarnan stað að næturlagi eða í morgunsárið þegar fólk er enn sofandi og hafa þær valdið mikilli reiði. "Bandalagið skilur að hersveitir þess eru gestir í Afganistan," sagði Scott Nelson, talsmaður fjölþjóðahersins, og sagði herinn myndu breyta aðferðum sínum til að viðhalda góðum samskiptum við afganska alþýðu.