Eldsneytisgjald flugfélaga hækkar

Flugfélagið British Airways er enn að hækka svonefnt eldsneytisgjald vegna hækkandi olíuverðs á heimsmarkaði. Gjaldið hefur haldist óbreytt hjá Flugleiðum frá því 1. júní. Á lengri leiðum hækkar olíuálagið á hvern flugmiða hjá Brithish Airways úr 330 krónum í 787 krónur, aðra leiðina, en fer upp í 1574 krónur báðar leiðir. Á stystu leiðum verður gjaldið óbreytt, 330 krónur á hvern legg. Flugfélög víða um heim hafa gripið til þessara ráða á árinu og þegar Flugleiðir lögðu á gjaldið 1. júní sl. hafði eldsneyti hækkað um 23 prósent í verði frá áramótum og um heil 60 prósent miðað við sama dag fyrir ári. Gjald Flugleiða er 800 krónur báðar leiðir og þar með talsvert lægra en gjald Brithis Airways sem telur að þessi aukaskattur muni skila félaginu um það bil milljarði króna upp í olíureikninginn á þessu ári. Gjaldið er ekki lagt á ódýrustu miða Flugleiða. Félagið hefur að svo stöddu ekki íhugað frekari hækkun, þrátt fyrir að hækkunin til dagsins í dag sé orðin mun meiri en hún var 1. júní, eða 40 prósent, að sögn Guðjóns Arngrímssonar, upplýsingafulltrúa félagsins.