Prestur gerði grín að Bush eldri

George Bush Bandaríkjaforseti brosti breitt þegar séra Martin Luther Agnew predikaði yfir forsetafjölskyldunni í messu í gærmorgun, þrátt fyrir að presturinn hafi hvatt söfnuðinn til þess að losa sig við eigur sínar og gert létt grín að George H.W. Bush eldri, föður forsetans. Bæði Bush eldri, fyrrverandi Bandaríkjaforseti, og sonur hans, núverandi forseti, höfðu brugðið sér í messu í kirkju skammt frá sjávarsetri fjölskyldunnar í bænum Kennebunkport í Maine. Með í för voru eiginkonur þeirra beggja, sem og þrír bræður forsetans, þeir Jeb, Neil og Marvin. Fyrir utan kirkjuna stóðu glæsibifreiðarnar í röðum, og báru þess ótvírætt vitni hversu auðugir kirkjugestirnir voru. "Jesús sagði: Seljið eignir yðar og gefið ölmusu," sagði presturinn í predikunarstólnum. "Ég er sannfærður um að það sem við eigum stjórnar okkur, og að það sem við gefum frelsar okkur." Séra Agnew dró meðal annars upp golfkylfu til að leggja áherslu á mál sitt og fór að segja sögu af klaufalegum tilburðum Bush eldri á golfvellinum. Bush eldri sat svipbrigðalaus undir þessum lestri, jafnvel þótt fjölskyldumeðlimir hans, þar á meðal núverandi forseti, hafi litið til hans brosandi.