Til liðs við Afríska þjóðarráðið

Nú hyggst Nýi Þjóðarflokkurinn í Suður-Afríku, arftaki Þjóðarflokksins gamla sem tók upp aðskilnað kynþáttanna þar í landi, ganga til liðs við sinn forna fjanda, Afríska þjóðarráðið, sem áratugum saman barðist gegn aðskilnaðarstefnunni og náði síðan völdum í fyrstu frjálsu kosningunum í landinu árið 1994. Nýi þjóðarflokkurinn ætlar að ganga til kosninga undir merkjum Afríska þjóðarráðsins, en síðan verður Nýi þjóðarflokkurinn formlega lagður niður í september á næsta ári. Marthinus van Schalwyk, leiðtogi Nýja þjóðarflokksins, segist ætla að ganga í Afríska þjóðarráðið á næstu vikum og hvetur flokksfélaga sína til að gera slíkt hið sama. Thabo Mbeki, forseti Suður-Afríku, fagnaði þessari ákvörðun Nýja þjóðarflokksins.