Óttast fjölgun kúariðu í mönnum

Breskir vísindamenn óttast að kúariða í mönnum, eða Kreuzfeld Jakobs veikin, breiðist út í mönnum á næstunni með áður óþekktum hraða. Nýjar rannsóknir sýna að sjúkdómurinn getur smitast í gegnum blóðgjafir og einnig hefur komið í ljós að mun fleiri genategundir eru móttækilegar fyrir sjúkdómnum en áður var talið. Flestir þeir Bretar sem fengið hafa kúariðu hafa smitast eftir að hafa neytt mengaðs kjöts. Kúariðu varð fyrst vart í mönnum árið 1995. Fjöldi fórnarlamba náði hámarki árið 2000 en þá létust 28 úr sjúkdómnum í Bretlandi. Síðan þá hefur tala látinna farið lækkandi, en nú óttast vísindamenn að hún kunni að hækka á ný.