Grunaðir um aðild að Al-Kaída

Þrettán menn sem grunaðir eru um að eiga aðild að Al-Kaída hryðjuverkasamtökunum eru nú í haldi lögreglu í Bretlandi. Mennirnir, sem eru á aldrinum nítján til þrjátíu og tveggja ára, voru handteknir í borgunum Luton, Blackburn og Bushey, skammt norður af London. Ekki er vitað á hvaða upplýsingum lögreglan byggir handtökurnar eða hvaðan þær koma en einhverjir telja að nýlegar handtökur í Pakistan á háttsettum Al-Kaída meðlimum hafi komið við sögu. Lögreglan hefur haldið áfram að ráðast inn í fjölda húsa í London, Hertforskíri, Luton og Blackburn. Allir mennirnir eru af asískum uppruna en einhverjir þeirra eru með breskt ríkisfang. Samkvæmt hryðjuverkalögum í Bretlandi má aðeins halda mönnunum fram á fimmtudagskvöld án ákæru. Þá þarf að fá dómsúrskurð um gæsluvarðhald í fjórtán daga til að halda þeim áfram án þess að ákæra liggi fyrir. Einungis fjórtán af yfir fimmhundruð sem hafa verið handteknir á grundvelli laganna hafa verið dæmdir sekir. Mannréttindasamtök í Bretlandi hafa lýst yfir áhyggjum í tengslum við lögin og segja þau hafa verið gróflega misnotuð. Talsmenn samtaka múslima í Englandi hafa sömuleiðis lýst yfir milkum áhyggjum og segja að mörgum múslimum finnst þeir vera hálf ofsóttir af lögreglu.