Bjólfskviða kvikmynduð á Íslandi

Tökur á kvikmynd sem byggist á Bjólfskviðu hefjast á Suðausturlandi í þessum mánuði. Þetta ku vera í fyrsta sinn sem þessum breska menningararfi er breytt í bíómynd. Kvikmyndin verður sú langdýrasta sem gerð hefur verið hér á landi. Bjólfskviða er fornenskt kvæði sem er talið að hafi varðveist frá fyrri hluta 8. aldar. Tökur hefjast nú í ágúst á kvikmyndinni sem ber enska heitið Beowulf & Grendel. Þær fara alfarið fram á Vík í Mýrdal og Höfn í Hornafirði. Leikstjórinn, Sturla Gunnarsson, ku hafa haft þetta svæði í huga alla tíð, enda sé það eini staðurinn sem kom til greina sem sögusvið myndarinnar. Sturla hefur starfað alla sína ævi í Norður-Ameríku og Kanada og leikstýrt þar hátt í 30 kvikmyndum og sjónvarpsþáttum. Kvikmyndir hans hafa unnið til Emmy verðlauna og verið tilnefndar til Óskarsverðlauna. Framleiðendur myndarinnar eru Friðrik Þór Friðriksson og Anna María Karlsdóttir og bresk og kanadísk fyrirtæki eru meðframleiðendur. Með hliðsjón af velgengni mynda byggðum á Hringadróttinssögu er talið að verkið teljist vænleg fjárfesting. Friðrik Þór, segir ástæðuna fyrir því að ekki hafi verið gerð mynd áður um Bjólfskviðu, vera þá að mjög erfitt sé að vinna handrit upp úr ljóðabálknum. Honum finnst þó vel hafa til tekist þó frjálslega sé farið með efnið. Með aðalhlutverk í myndinni fer Gerard Butler, sem leikið hefur í Timeline og Tomb Raider. Svo má nefna eina skærstu kvikmyndastjörnu Kanadamanna Söruh Polley og Ingvar Sigurðsson. Til að gera sér grein fyrir stærð verkefnisins má geta þess að framleiðslukostnaður myndarinnar er 12,6 milljónir dollarar, eða yfir 900 milljónum íslenskra króna. Stóru íslensku bíómyndirnar hafa hingað til kostað um 140 milljónir króna.